【李聲揚】NetFlix 績後升15%創新高,但純利收入都低過預期,升乜?

TLDR:純利收入都低過預期,升乜?冇錯訂戶數係超過預期,但帶唔到純利收入又有乜用?最令人驚喜嘅其實唔係呢啲,係公司卒之燒錢燒成正果,而家話唔使再燒,仲分分鐘有錢做回購。公司原本一路燒錢,但肺炎救佢一命,除咗多人訂,同搞到迪士尼好忙外,最重要係:低息!不過睇返,過去半年公司股價根本橫行,你miss一日就冇咗15%。將來會點?迪士尼定Netflix?Why not both?Amazon都冇殺死Walmart,但殺晒啲中小企。最後我仲會講下Netflix獨特嘅企業文化。
Netflix純利收入都低過預期,升乜?
過去半年Netflix股價只係橫行,搞乜?
Netflix以燒錢出名,但肺炎救佢一命
Netflix而家止血,唔使再舉債,仲話會回購。十年第一次
迪士尼定Netflix做霸主?Why not both?
而家你睇梗係爽,但之前Netflix一樣有無數低潮
最後: Netflix獨特嘅企業文化
Netflix純利收入都低過預期,升乜?
1. Netflix出完第四季(亦即係全年)業績,升14%,股價創新高
2. 但,升乜?你見純利,大幅低過預期。收入,亦都係低過分析員預期。「明明埃汾話業績冇好定壞,只有好過預期定低過預期」(呢啲咪你學藝不精咯,睇多啲文啦)
3. 咁可能都有人留意到,訂戶數目幾好,遠超預期。第四季上咗850萬個新客,遠比市場預期嘅650萬為多。全年上咗3700萬新客,史上最多了。而家去到2.04億訂戶,唔好忘記仲要係入唔到14億人嘅大陸喎。(Facebook Youtube Whatsapp 微訊 instream 抖音嗰啲10億人用,但,免費嘢點同)
4. 不過,如果只係訂戶數字勝預期,但純利同收入差,有乜用?唔足以令股價咁升吧?所以我相信,係因為其他原因。
5. 咩原因?就係因為公司宣佈現金流轉正(講FCF,Free cash flow,唔知係乜有得佢,但呢個唔係純利),應該好多人都知Netflix以燒錢出名,似乎止血了。仲有,話唔使再借錢,唔使債冚債,之後到期嘅債,內部現金夠找。仲話有閒錢可以做share buyback,回購股票,嘩。十年未試過。
過去半年Netflix股價只係橫行,搞乜?
6. 回帶少少,發唔發現,呢半年冇乜聽Netflix呢隻股票嘅新聞?劇集電影就好多,但隻股票極靜。因為半年都係橫行,鳩做,連登仔又可以鬧升市冇自己份(見好多人鬧隻蘋果,但舊年升一個開,之前你又唔買?奉旨要等埋你上車?)
7. 但,事實係嗰句,Success Is Like Being Pregnant Everyone Says Congratulations But Nobody Knows How Many Times You Were 忽ed. 雖然話疫情受惠股,但舊年下半年,股價真係橫行的。而家又梗係個個話成功啦,但之前半年呢?
8. 特別係舊年第三季業績後,隊咗一轉。都幾合理,因為大家覺得,爆到遍地開花,要上台嘅都上晒了(呢個嚟緊都會係Netflix嘅死穴)。舊年第三季都未訂嘅人,應該成世都唔會訂—Turns out 唔係,咪話第四季都仲上咗650萬人—其中一個就係我!
9. 我在台灣隔離十四日,結果join咗兩樣以前唔用嘅嘢:Netflix,同埋外賣平台。外賣平台用咗好多。Netflix?我差不多冇睇過咁滯,但月費照交。幾咁好嘅business model,況且佢marginal cost極低
Netflix以燒錢出名,但肺炎救佢一命
10. 再回帶遠少少,當局者迷。你而家睇返,根本覺得買Netflix係撈兵拿,正如當年買Facebook 買Starbucks一樣,見到呢啲公司點冒起,同埋點趕絶傳統公司。大把時間畀你買。但中間你總會質疑好多嘢,人之常情。Netflix就係畀人質疑得最多嘅(包括我),亦所以升得最勁!
11. 道理好簡單,Starbucks大家都知幾毫子咖啡豆賣你幾十蚊杯賺到笑,頂多畀高少少人工搵幾件四正啲嘅少男少女叫下你個名。貴租?人地交得起。有人租咪合理。但,正係太簡單啦,早早都知道。
12. Netflix Tesla唔同,呢啲公司一來太劃時代,二來太出位,三來太進取,一路有人質疑。創辦人都話你知公司一度生死邊緣(Starbucks應該冇試過)。但正係因為咁,先升到你笑。
13. 講返,即使我唔上Netflix,都知道你地上,人人都見到。但啲人質疑乜?就係公司一直不停燒錢,燒得好勁。搶market share,買內容,整內容,搶人(Netflix出撚名人工高,但,請你先算啦,我夠知美斯C朗人工高)。一直唔少人質疑,玩呢個燒錢遊戲玩到幾耐?公司嘅護城河亦好似唔夠高,傳統公司(主要係迪士尼)大把錢燒,你點夠佢嚟?
Netflix而家止血,唔使再舉債,仲話會回購。十年第一次
14. 但,好大程度上,Netflix先係最大嘅肺炎受惠股。冇工返冇學返留在屋企睇Netflix就好明顯,但仲有三個層面:第一,迪士尼火燒後欄(戲院收皮,樂園唔開,ESPN冇波播),唔得閒應付你住。第二,戲院唔開,直頭加速晒啲人睇戲睇電視嘅習慣改變,我估第時同啲新一代講阿叔以前去戲院拍拖,等於我老豆同我講佢當年去涼茶舖聽歌睇電視咁。
15. 但重要嘅係,第三:低息,買債,印銀紙。如果而家5厘息甚至10厘息,Netflix嘅情況可能都幾唔同。低息,當然係有利啲借大錢搏老命嘅公司,例如Netflix同Tesla,or to a certain extent恒大之類嘅內房,同時懲罰債主同埋儲錢嘅人(睇咗咁多年仲未睇穿?)。
16. 好啦,結果Netflix搏一搏單車變摩托,突襲荷里活同迪士尼成功,燒錢有回報,再嚟一場肺炎真係天助我也,利率低令利息開支冇乜壓力,要發債融資亦大把人願意。結果公司而家話正現金流(Free Cash flow,唔同純利),唔使再燒錢
17. 再講白啲,公司話明嚟緊幾個月到期嘅5億債,唔使re finance (即係新債冚舊債),直頭內部現金夠找,仲話唔使再倚賴外部融資。仲痴線到話可以有能力回購股票!十年冇試過
18. 回購嘛,當然係好東西。唔好執著於啲乜鬼「回購只係財技」嘅廢話。咁派息係咪財技?你又鬧公司唔派息?美國公司好多都只回購,唔派息,原因之一係有股息稅。回購是甚麼?你咪當係印公仔紙集資嘅反向過程,公司用入面嘅錢(留意!唔同大股東增持!),買返街度嘅股票。並唔止係「托價」(反正完全合法),而係我公司如果有錢冇地方洗,與其派息畀股東股東仲要畀人扣稅,與其管理層做埋啲白痴收購,不如就買返自己股票。買完公司冇錢會少咗錢—但總股數都少咗,咪拉高個每股盈利(Earnings per share)。你睇蘋果每股盈利嘅升幅,係明顯高過佢純利升幅,因為不停回購。
19. 如果玩得再盡啲?我以前都寫過,啲公司借錢然後拎啲錢做回購都仲得!啲巨型科企發債咁平,根本有數計。借平錢不停買自己啲股票,幾咁簡單。
20. 所以你而家明點解低息環境有助股市啦!亦明白點解美國啲左翼(包括好多民主黨嘅後生)鬧聯儲局劫貧濟富。你睇到個騙局未?長期低息,有事就救企業,印錢。作為散仔,不投資,你係肯定向下流的。
21. 我唯一有少少懷疑係,Netflix真係有必要回購股票?股價都在高位,亦都要大量投資,係咪批新股會著數啲?
迪士尼定Netflix做霸主?Why not both?
22. 將來會點?上個月舊文(到底我一個月寫幾多文?)有寫過迪士尼 vs Netflix(但主要由迪士尼角度出發)。你可以當Netflix偷襲成功,巨人迪士尼未識反應,加埋一場肺炎幫到Netflix,一度Netflix市值大過迪士尼,十分有意義嘅一刻。但講咗,舊年下半年Netflix原地踏步,迪士尼就越升越有,因為企穩陣腳,你識串流我唔識?迪士尼始終有品牌有內容同有錢,點會坐以待斃?
23. 誰死誰負?我估係大家都贏,super!講真的,你見Amazon都冇打死Walmart,人地啲CEO拎咁高人工唔係流的,唔係坐定定講句「網購大勢所趨冇得搞」就得,否則請你返嚟把托?
24. 睇嘢唔好咁表面,冇話唔係你死就我亡,亦唔只係咩新一代挑戰廢老。出嚟行求財唔係求氣嘛。有話根本Netflix根本冇改變荷里活,係荷里活改變Netflix(https://bityl.co/5HDn),Netflix都要跟荷里活玩拍戲拎奧斯卡嘅遊戲(我諗起話滿人蒙古人被漢化咁)。甚至有人話,而家迪士尼先係挑戰者,Netflix係Incumbent 舊勢力(即係,「建制」)。也不無道理,反正兩間公司咁高咁大,市值差不多,叮噹馬頭,大衞已經變到哥利亞咁大
25. 咁咩公司死?咪就係其他小型公司。Go Bear舊文都有講(https://bityl.co/5HDf),啲咩二三線媒體公司,特別係只做內容冇平台嘅,應該好快死得。呢,話口未完美高梅(MGM)就似乎要賣,得啲占士邦片咋,冇戲院你點算(https://bityl.co/5HDo)。
26. 你估真係Content is King?時代唔同啦,Facebook 啲content 差不多全部唔係自己,亦都一個仙都畀你,但你自動免費幫佢做content.係咪令你諗到啲乜?
而家你睇梗係爽,但之前Netflix一樣有無數低潮
27. 最後補多幾樣。首先再係講,Stay invested.今時今日嘅Netflix,都話市值同迪士尼咁大,已經係幾成熟嘅公司。可能升多幾倍,但照計唔會升十倍。甚至話,你當佢一年升15%,已經交到貨,美股一路以嚟長期回報都係咁上下。咁你見,15%,往往就係一晚之間升晒!之前半年橫行。你走漏一日,就冇。
28. 哦,你話咁好易,我出業績前買,出完就沽咗佢。但,如果差過預期咁點?你而家睇返係簡單,Netflix連續31季收入增長超過20%。但你見2012年尾時,增長一樣由50%跌到單位數,當時啲股價一樣坐過山車,十個有九個都震走啦,「止蝕」嘛
29. 事實你見到,雖然連續31季收入增長超過20%,但最新增長係2013年中以嚟最慢。亦所以話間公司已經開始成熟。早前講過,「而家去到2.04億訂戶,唔好忘記仲要係入唔到14億人嘅大陸喎。(Facebook Youtube Whatsapp 微訊 instream 抖音嗰啲10億人用,但,免費嘢點同)」
30. 但另一角度睇,仲有幾多空間?不過管理層當然一早知你會問(知道出面擔心乜嘢,呢啲真係基本功),就答你,Netflix暫時只係佔美國人睇電視時間嘅10%,仲有空間上。又當然,公司應該係有啲加價空間的,我唔覺得加10%會有超過5%嘅人走佬,個total income應該仲大。最後,會唔會做收購?
最後: Netflix獨特嘅企業文化
31. 真係最後,我睇到一半,但推介大家睇No Rules Rules呢本書。唔好只係用用家嘅角度去睇間公司,Netflix在商界,最出面係獨特嘅「企業文化」—好多公司(特別係香港公司)都濫用呢個字,根本就冇文化。
32. Netflix嘅文化就出晒名,精英主義,自由,好Q高人工(人地工程師一年出幾十萬花紅,美金啦梗係),但極之高壓,炒人全不手軟,先唔會理你啲KOL講咩影響士氣(個個生意都未做過去教人地美國巨企管人,好好笑)。天才嘅天堂,平庸者嘅地獄。
33. 想快睇嘅,可以睇呢篇文,中文嘢,易入口(https://bityl.co/5HEU)。但簡單嚟講,精英文化,好似歐洲頂級球會或者NBA咁,唔使講人情,我地唔係一家人,你掂嘅你上,唔掂嘅即時收工。你放工做乜我唔理你,上到場冇貨交嘅即死,唔使講咩「我為公司打咁多年江山」。阿丕嫂就係批鬥大會,聞說好似人工都完全公開。
34. 你稍為有啲自己之明嘅,就知道呢啲公司唔係正常人可以入到,正如你都唔會去皇馬巴塞踢正選。亦所以你啲濕鳩公司唔好諗住學人地。打工更加唔好怨咩「才華同收入唔成正比」,有冇諗過如果真係成正比,你可能仲低人工?
35. 幸好,你冇料在Netflix做都好,你都可以買佢嘅股票!分享人地嘅成果。係咪好偉大?
36. 仲有,唔好以為搞間公司只係識拍戲 識搞算法就得。踢波都仲只係場上嗰十幾個人,Netflix咁大,唔通創辦人自己去拍戲?去睇韓劇?一定係靠其他人。佢點請到好嘅人?就係靠以上講嘅嘢,而唔係講埋啲乜撚work life balance(但唔畀錢),”we offer competitive salary and benefits”。Netflix最叻,可能係管人。人地offer NON – competitive salary and benefits—高到你根本match唔到。
37. 仲有,財務呢?你可以話佢大膽,但咁大間公司點都係calculated risk,夠膽咁樣燒錢去搶份額,而唔係坐定定講「巨企霸權打壓我呀」。而家梗係個個都識講燒錢搶市場,但人地幾多年前做?

============

了解更多:股市漁夫系統 免費試用

漁夫選股系統 stockfisher.com.hk – 莊志雄博士|最強突破股篩選系統

股市漁夫是一套高績效的選股系統,系統運用技術分析配合統計學製作出不同指標顯示短、中、長線的港股表現;較一般指數更能反映真實市況,對分析後市走勢有絕對的優勢。股市漁夫選股系統透過精密的方程式去找出股票強弱勢頭,全天侯自動分析個股走勢、突破股、大市評論及視頻等功能。莊博士獨家的運算方程用 「破勢」、「止賺」把機會向用戶展示。漁夫選股系統更有不同種類之篩選股票準則來提高勝算。

 

莊志雄博士為股市漁夫創辦人及香港大學專業進修學院客席講師,並在Now 財經台合作主持《名家給力場》。
股市漁夫是香港財經媒體,而股市漁夫選股系統由莊志雄博士及成家博客Homeblogger團隊共同研發,2018年 11 月11日正式推出,此前莊志雄博士曾任職《信報》研究部主管,並先後於和記黃埔、AXA安盛、永泰地產有限公司、永道管理顧問有限公司(Coopers & Lybrand)等不同類型企業及上市集團擔任管理顧問、財務及市場分析工作,涉及範疇包括資產管理、地產、電訊及電子商貿等。

 

 

 

 

 

漁夫選股系統 stockfisher.com.hk – 莊志雄博士|最強突破股篩選系統
(系統只接受信用卡付款)
 
收費:$ 7888(一年期)
– 一眼看清大市中短線方向
– 全天候資產配置例子教學
– 每週會員片總結宏觀觀察
– 股市掃描助手幫你省時找出潛在轉勢股份
– 股價提示功能
– 用戶教育短片示範
– 莊博將其貼市分析在系統內視頻發放
付款步驟:
2. 網站裏會看到【成爲用戶】的方框,選擇「訂閲」,然後填好資料後再按下「注冊賬戶」。
3. 利用年繳$7888選項用信用卡完成付款。
客戶服務:91010168(whatsapp)上午10:30 — 19:00

使用諗Sir獨家按揭進階計算機,Powerteam成交實例請到:https://buyhouse.com.hk

wtsapp icon top