10月28日周三。是日恒指微跌，但阿里（9988）、企鵝（700）創上市新高。
今日船長留言，話小弟咁樣用漁夫系統，小錯特錯。何以故？佢話只搵新出訊號的股份，就會只搵到落後嘢。因此，應該逐個板塊睇下有乜領袖股，啲能量格數係突然增加的，仲問我有冇留意到企鵝能量1日加咗3大格……小弟擘大個口得個窿，但係又學多一樣技能，今日就試下。
首先去風中勁草，以行業分類，就睇到各個板塊的風中勁草，睇下佢哋的勢頭，早出突破日的就係那個板塊的領袖股。兩隻A股ETF能量維持兩格，無起跌。運輸板塊，嘉里物流（636）的能量加咗1格，股價又去返近頂位，未有轉弱跡象，似乎值得留意。其實同板塊的海豐（1308）及中遠海控（1919）走勢都唔差，能量有四五格。一個板塊有兩三隻強勢股，信心也會大啲。
酒店餐館板塊，領袖股呷哺呷哺（520）股價新高但能量-1。貴金屬與金屬股共有四隻風中勁草，紫金（2899）與招金（1818）兩者，紫金走勢較突出，也是領袖股，但能量-1。宏橋（1378）與贛鋒鋰業（1772），贛鋒剛於上周出突破訊號，今日業績，拭目以待。
資訊科技硬件，漁民蛇羮（1337）能量仍有3格，20日能量90%，陰陽燭擒日以長下影揩一揩10天線上番嚟，強勢應未完，值得留意。軟件方面，小弟missed咗的企鵝，能量滿滿5格，股價破頂，唉，走寶。其實ATM中的美團（3690）都唔差。值得留意係金山（3888）能量+3，可能行區間上44元，這隻股份有相關期權，但較為疏落擘價較闊。
製藥股，兩隻有突破訊號股中，領袖股百濟神州（6160）於4月已出訊號，至今升幅85.77%。漁友Alice留意到指標勁靚的藥明康德（2359）也出訊號，能量5格，20天能量85%，走勢勁，今日公布業績，小弟都研究下先！講開又講，船長一早提點的比亞迪電子（285）今日公布業績，比亞迪（1211）也是今日公布業績。
紡織品板塊，領袖股贏家時尚（3709）能量+2，股價創新高；李寧（2331）能量+1。紡織品板塊有5隻風中勁草之多，船長也曾在fb提過呢個板塊，小弟會等調整吸納。
今日第一次寫咁多板塊，下次揀重點來寫，費事悶親大家。
大市走勢，50天線及150天線比率都回落，恒指相對只係微跌，企鵝有功。
睇番投資組合，特步（1368）無咩特別，繼續持貨。
有漁友問特步係咪2.69元嚴守止蝕，之前亦有漁友話見升唔敢追、唔願止蝕愈跌愈低，小弟都經歷唔少，也借呢個機會分享下小小個人睇法。
首先講係咪嚴守止蝕，如果你的計劃是穿2.69元便斬，小弟認為除非買入時已好有conviction做核心持倉，否則應該跟隨你原本訂下的計劃，因為這關乎discipline，你這隻不止蝕，下一隻不會，下下隻都不會。小弟經歷過的心魔就係心存希望「等下先，可能升番呢」，但如經歷過股災或股價暴跌，好多時你唔跟自己個plan止蝕，睇住股價跌跌不休，到最後忍唔住引刀一快，往往就係沽正個底，呢種經歷我試過，我真係試過。
亦因此，練就咗小弟每次入市前，首先要睇唔係會升幾多，而係最多可以承受到「跌幾多」？然後，就用可以跌幾多個金額，來推演番小弟應該「買幾多」，例如我這個trade最多只能輸2000元或10%，咁我就只能買20000元，如此類推。咁樣，我才能控制這個trade的最大風險。Manage the downside, the upside will take care of itself.
見升唔敢追，小弟有時亦會套用呢個方法買突破股，就係高追前先預算一旦突破失敗跌番轉頭，輸幾多會止蝕。就以特步為例子，假設我在2.79元買，預計佢會升至3.99元（賺1.2元），跌穿2.69元止蝕（輸0.10元），我是用0.1元博取1.2元，即RRR是1:12。假如特步升到3元穿前高位似突破，我仍以2.69元作止蝕，就係以0.31元博0.99元（3.99-3），RRR是1:3.2，值博率減咗但仍可接受，咁我會小注嘗試。
再假設，如特步升至3.1元突破250天線，以同理高追，RRR就會降至0.41（3.1-2.69）vs 0.89（3.99-3.1），RRR僅得2.17，就未必值得出手。如果真係好有信心會再升，亦唔係無辦法，就係將止蝕推高（通常係整數關口位以下），例如2.98，咁RRR就會變成0.12（3.1-2.98）vs 0.89（3.99-3.1）= 7.41，以縮減可承受風險來提高值博率。
股市就係值博率的遊戲。大家唔好忘記，漁夫系統的設定，RRR是1:5。
今日寫住咁多先，有關止蝕的執行，下次再講。
============
了解更多：股市漁夫系統 免費試用
股市漁夫是一套高績效的選股系統，系統運用技術分析配合統計學製作出不同指標顯示短、中、長線的港股表現；較一般指數更能反映真實市況，對分析後市走勢有絕對的優勢。股市漁夫選股系統透過精密的方程式去找出股票強弱勢頭，全天侯自動分析個股走勢、突破股、大市評論及視頻等功能。莊博士獨家的運算方程用 「破勢」、「止賺」把機會向用戶展示。漁夫選股系統更有不同種類之篩選股票準則來提高勝算。
莊志雄博士為股市漁夫創辦人及香港大學專業進修學院客席講師，並在Now 財經台合作主持《名家給力場》。
股市漁夫是香港財經媒體，而股市漁夫選股系統由莊志雄博士及成家博客Homeblogger團隊共同研發，2018年 11 月11日正式推出，此前莊志雄博士曾任職《信報》研究部主管，並先後於和記黃埔、AXA安盛、永泰地產有限公司、永道管理顧問有限公司（Coopers & Lybrand）等不同類型企業及上市集團擔任管理顧問、財務及市場分析工作，涉及範疇包括資產管理、地產、電訊及電子商貿等。
