歡迎大家加入新開設「美股研究報告」會員專用 Facebook 群組
https://www.facebook.com/groups/386563215606501/
====================
最近，當我做ETF研究嘅時候，其實好清楚就見得到啲資金係流向緊去邊啲板塊。
先講一句可能同大家印象唔同嘅說話。美股，其實真係唔算強。強嘅，只係以下兩個大板塊。第一，科技、互聯網相關。第二，健康護理。至於其餘板塊，當然都有強勢股，但整體行業嚟講，唔強。
咁有邊啲ETF最靚？例如係OGIG。
呢隻ETF，基本上自從喺5月破頂後，升勢都一直無停過。點解升得咁勁？睇持股就會明白。
OGIG，最大持股依次序係Amazon、阿里巴巴、騰訊、Microsoft、Alphabet、Facebook、Shopify、拼多多、美團等。
點解我話唔係美股強，而係科技同互聯網相關股強。原因你會睇到，呢個升市係行業重於國界。
不過，講返投資策略，OGIG距離止蝕位太遠，我知都有朋友揸呢隻，又或者類持ETF，而做法就係揸住嘅繼續揸，未有貨嘅，宜等下次整固後反彈，止蝕位上移時買入。
另外，講吓隻KURE。
呢隻係一隻中國醫藥嘅ETF，近月升得好靚。再睇持股，基本上都係一啲喺中港上市嘅醫藥股。
諷刺嘅係，你想分散投資，買中港醫股，喺香港市場，你係唔會揾到有適合嘅投資工具，但喺美國，你反而會揾到呢隻唔錯嘅ETF。
但都係，止蝕位太遠，未有貨最好等整固後再上，止蝕位調高後先買。
大路嘅ETF，例如係IGV，就唔多講喇。跟住策略，就可以買。反而，我想再講吓隻FFTY。
FFTY，未必係我會叫你直接投資嘅股票，因為佢嘅持股唔係隻隻都靚，整體ETF走勢都唔係最強勢，但用嚟做揀股嘅名單，我覺得一流。
佢嘅持股，係一啲創新公司，好似係CHGG，走勢雖然唔穩定，但自3月起升幅超大。另外，VEEV，更加係升到癲。
當然，VEEV 唔會係低風險嘅投資，但如果想博，都可以博，睇住$228.81做止蝕位就可以。
投資，好重要就係，要揀一啲適合自己嘅股票或者ETF。如果你係想穩陣啲，咁可以揀啲揸大股嘅ETF。如果你係想博啲，就可以喺一啲大升嘅ETF入面，尋找一啲最強勢嘅股票。
而整體而言，我覺得泡沫正在形成緊。但呢個唔係美股泡沫，而係環球嘅科技股泡沫。但只要跟住策略，順勢而行，泡沫可以係大家一個可以獲得巨大回報嘅機會。