樓市淡友都係要向現實屈服(問)

諗sir你好 , 拜讀閣下之文章令小第獲益良多 , 本人是庸才一名 , 現有問題想請教諗兄 本人34歲 ,女友28歲眥為自僱人仕年收入合共約550k (但經合法避稅後就分別報月入13k及 20k)已同居數年 ,一直租樓住 ,做服務業 ,工作屬手停口停一類 ,在沒太多安全感下 ,一直把收入6成儲起 ,現租住市區舊樓 ,租金$7000  , 眼見租金不斷上升 , 幫人供樓的滋味真不好受 , 現想買一層樓自住 本人原是樓市淡友 , 一路想等樓市跌兩成才入市 ,由09年等到現在都係要向現實屈服 ,但就算依家買都只係盡量買最平的單位 , 以保留實力在跌市時可加注 現有資金80萬 , 打算明年3月前以女友名義9成按買入一約250-300萬的單位 , 有以下選擇 A  選偏遠地區私人屋苑 , 女友較不屬意此選擇 , 因一直住開九龍市區 , 習慣了返工放工只需15分鐘 ,並考慮到將來有小朋友後不方便老人家幫手湊 B  買市區的二手居屋 , 較實用 , 位置亦較方便(其實女友都仲係覺得返工遠左,因好多居屋都要駁多一程車) ,但一般樓齡都很舊 , 怕居屋的質量在再過一段時間後問題會慢慢浮現 ,而且如果第時想換樓亦較難出售 C 買市區地鐵沿線單棟樓 , 好處係方便 , 第時放租亦較易 ,但一般都不太實用 ,銀行亦可能估價不足 ,而且筆直可買的都是非常細的單位 D 繼續租樓住 , 等抽白表免補地價居屋資格, 不過唔知等到幾時 , 但抽到的話可節省約100萬地價 , 足夠抵消很多年的租金支出 E 7成按買入新界200萬以下單位偷雞放租 , 自已繼續租市區樓住 , 主要用黎抵消租金的支出 因為第一次買樓 , 很怕下錯決定 ,希望諗sir能給些意見 另一問題 , 在投資角度 ,以同價錢黎講 , 私人屋苑細兩房 定係近鐵路居屋三房較好? 最後祝諗sir身體健康 , 生活愉快 ->>按此看答案  

Read more

換樓好唔好?(答)

->>按此看問題   kitty小姐的個案相信好多人都面對過。結婚「猛猛緊」買間兩房上車,及後發覺要三房先夠用(其實係香港梗係越大越好),於是心中計數如何改善居住環境。  方案一就係人都曉,就係賣左舊樓買番新樓。中間好多人間係究竟賣樓先定係買樓先呢? 對自己最著數既係賣樓數期短,買樓成交期長,咁你既cash就最鬆動啦。但要注意係賣樓一收左錢係就要交吉(搬走),所以請勿係新樓睇到十畫都未有一撇時就走去沽出現居。諗樣係早期文章已有提及詳細情況,如同賣家議價到3-5%內時可以點做,提前成交如何完成等,請留意blog中其他文章(其一參考買樓附送試住期)。  Kitty如要一沽一買未必合適,始終手上現金及月入未見強大,等兩年後抽居屋,真係有可能抽唔到。因政府好大可能將抽居屋入息上限調至三萬五至約四萬水平,多左人爭居屋。   建議可以先將現樓租出,再自己去租三房。好處係唔便比兩次傭(一賣一買),又唔使再行SSD(三年),更可慳比大部份印花稅。賣出金獅收1%即$25000,買入三房至少都三百幾萬,又約$35000,最後新樓更要打印花稅約$70000,即係呢個動作未計裝修先洗十三萬! 呢十三萬只係益左人同政府! 咩都買唔到(除左幾個印)!  

Read more

居屋村屋有咩唔妥當? (答)

->>按此看問題   再買第二個單位可行嗎?  根據借貸力,追揸沽如再每月供多六至七千蚊是有可能的! 但在此時load到咁重貨實在不妥,就算手中餘下80萬現金亦不足保證高安全系數。只好勸你忍下手吧! 如你盡借,應該借二百萬左右有可能,不過呢個數都冇咩樓好買。 居屋有咩唔妥當?  居屋其中一樣唔妥當既,係限制左你去做抵押既能力,除非你補埋地價。不過買得居屋咪又係想慳返個地價,仲有平些少既管理費。如果追揸沽一開波係住緊係私樓,佢就唔駛焗住賣居樓套現。相反可以到銀行加按到七成,冇手續費仲有銀行1%現金回贈。 ……….已隱其餘內容 (內容已放入出版新書「樓換樓」,請在2013年7月19日後到各大書局購買) 或網上和筆者認購請email: [email protected]

Read more

審視借貸能力 再賣居屋未遲 (問)

問:   你好!!我叫德仔, 希望向你請教買樓既事!!我今年42歲沒有任何物業資產包括股票, 只有現金130萬(將手頭居屋賣出後的餘款), 每月收入$13.5k, 有太太 (家庭主婦) 及1個小孩, 每月薪金只夠支付生活費及交租, 本人是庸才一名, 現租樓與太太及小孩同住, 有買股票及牛熊證的經驗, 想請教現在買樓可以嗎? ->>按此看答案

Read more

樓市真正需求從未減少

又要打人又要驚  梁政府又要打人又要驚,新推五千名額免補價買居屋措施只會搞唔起泡。補價措施係新瓶舊酒,只不過重拾之前係政府會議舉出但未取得共識既政策。到而家真係動議推出又引起居屋炒風,適得其反,可算令梁政府露底。可讚既係新政府反應都算快,而家話真係買左都要有五至十年禁售期,減低居屋市場起泡既可能。由此預見該政策推出未必能真正撮合多宗成交,只會間中令高價成交出現。 為何高價? 因現居屋業主賣樓後就算再買返差唔多大既樓都要補好多錢,佢唔高價放真係換唔到樓。另有一批居屋業主係出面有物業既,呢批人有幾間樓係手當然唔急放一味死揸,真係大勢已去時佢地就會將手上單位一湧而出。 踏入下半年估計居屋會因少數高價成交而令業主心雄提高叫價,係數月後升浪會推至私人樓。可惜到下年年頭政策真正推出會發覺政策不太受歡迎,此利好因素會被去除,樓市相應下調。     真正需求從未減少  樓房需求有兩種,投資需求及自住需求。澳洲政府近幾次減息已經刺激了當地對樓房投資既需求,而係港元保持同美元息口一齊貼近零情況下,香港人對樓房既投資性需求未見減少。仲有你見本blog中不少讀者問既case都係手上自住樓有錢賺,呢個財富效應不斷為市場注入資金。就算歐債危機大爆發,都只可以連續兩到三季改變香港樓市上升既軌跡,要樓價從根本性下跌要有更致命既誘因。 人有時真係好多原因想買間自住樓,但係有兩種需求係計得到而又解釋到點解而家咁多人走去買樓既: 就係生仔同結婚   婚姻註冊數字 出生數字 2009 51175 82906 2010 52558 88200 2011 57883 95348 2012 首五個月 23217 37265(今年有龍年效應) 來源:政府統計處       中國人結婚最好就要有間樓,一年五萬幾人結婚既數字,就算減哂大陸假結婚,婚後再父母自住,結完婚唔係香港住,點睇都有兩萬pair人想買樓上會,只不過而家買唔到或覺得太貴唔買,所以見上圖見到越谷越上既租金。 每年有成九萬個小朋友出世,減左雙非婦估計都有成萬人想換大D間樓湊仔。上面兩萬而呢度一萬,好粗略估計每年新需求都有三萬。本來香港有唔少屋係空置,但係你而家有間樓係手,放左佢D錢可以做咩呢?? 放係銀行成年賺一萬幾千蚊息? 係投資需求大,之前每年儲落不少需求,而係特首講2015年先「有機會」達成每年兩萬個新落成房屋量之下,樓價想跌都幾難。而家只不過將D需求反映左係租金指數度,後生買唔成屋唯有係過往一年幫手谷高租金指數幾成咁多。     建議兩棲用地規劃模式 政府做野永遠都慢市場一拍,呢個係必然。由九七年前遲黎既居屋到董特首時既八萬五政策,都係市升時計劃起樓,市跌時先起好樓幫手推散個市。政府官僚架構令呢個情景不斷重複,造成樓市循環。要解決問題要提供一些廉宜而快建成既樓房,係供應量處低周期時快速增加供應量,另外緊係要當供應量高時拔走供應,令香港樓房供應量不要向兩邊極端搖擺。起青年宿舍只可以幫到未結婚既後生仔提供playground,但每年成幾萬對夫婦要樓住點搞呢? 政府不如著力改建工廈做酒店式住房,為夫婦提供一房/兩房一廁既居住空間,係現「求過於供」周期減低需求穩定樓價。到樓市下行周期可將部份樓層租予旅客,即時減低供應而不致推低樓市。酒店同自住既兩棲用地規劃模式可以實行嗎? 觀塘已有工廈改建成酒店,工程設計上一定做到。此舉亦可快速提供需求,更可把新造房間循環再用,政府自己控制市場樓房供應,唔使好似而家咁間接要批地比地產商又要再等佢地起樓。而家最有需要係結左婚既人,請政府唔好攞納稅人既錢去整間房比班後生仔住而妄想佢地唔會再上街、唔再打反政府既口號。     再唔係,走番以前條路批地起臨時搭建房屋。而家可以租比班後生住,第時市低時可以趁機重建老舊公屋村而用臨屋安置村民,呢D樓唔會有人買或可索性拆左佢減少供應。政府好似為九九年全纖全港既臨屋村而沾沾自喜,可是臨屋再唔係好似以前咁污穢,咁易倒塌。住係新搭既臨屋應該仲好過你屈係舊樓唐樓,或同奶奶成家人迫係一間屋。 至於近期既回購領匯、地鐵等建議,都唔係快見效之策。咁辛苦去傾點買返領匯,不如集中火力為大家提供快而廉既供應啦。

Read more

28歲應如何自處(問)

Lumyeung 你好,  這個社會上, 真心會教人, 會SHARE 的人實在太少了, 我讀了你的BLOG 一段時間, 獲益良多, 現真心誠心求教 小弟28, 大專學歷, 裝修行業4年, 平均2萬月薪, 但不穩, 未婚, 有女朋友做part-time少入息, 正儲錢結婚, 和為家人退休作打算, 父母皆超50歲, 仍算健康. 幸運地, 家人早有置業, 有約270萬未補地價自住21年樓齡540尺居屋, 父母與1弟正居住, 差餉地租每季$600, 管理費每月$600 亦有間約200萬38年樓齡full paid 300尺洋樓, 是小弟正在使用, 同時, 亦分租了一房給租客, 收租$3200, 差餉地租每季$400, 管理費每月$300 另有間約500萬的40年樓齡地鋪, 小弟是單邊業主, 與親戚聯名, 收租全數用作供養祖母 想和家人一起用資產, 用原有資產增加收入, 未知怎樣方法是最可取 自己做裝修, 叫做freelance, 無糧單, 問過銀行做樓按, 大多數都要糧單 有諗過自己開間小公司自己出糧俾自己, 但實情應該怎樣控作, 就不太知道 我不是廢青類, 我是肯捱, 肯受苦, 雖然唔叻但肯花時間去學習和尋求 […]

Read more

我應該悔婚嗎?

個案: msckw第一身講述:    我之前(因有一排好想好想結婚就一時衝動 ,開始左籌辦婚禮及下訂了酒席。但我同男友其實好多問題都未解決,依家好煩,煩到唔想結。   我男友好固執,睇張慧慈果啲書話兩公婆應全部錢放入一個聯名户口一齊用。而 我當然唔肯,原因係大家一樣揾咁多,佢供層居屋又唔會加我個名,我亦唔需要佢養起我,做咩要放埋一齊? 攪到我第時洗少少錢買野逗自己開心都俾人管住。   我地搵左婚前輔導傾,最後個輔導員建議大家夾同一amount出來一齊供樓俾屋企開支。男友話自己已讓步,已不需再共產。我就覺得唔公平,因為間居屋係佢同佢媽媽名,我亦唔洗佢補地價加我名,我只覺得無我名係唔應該由我供。佢地孤兒寡婦由細捱到大, 我都已迫於無耐同佢媽媽一齊住架啦。   我建議不如佢供樓,我俾洗費或個聯名户口佢供$10000而我供$7000,等我個心舒服(心理上唔會覺得自己白供樓),但佢都唔肯。   之前又話d錢俾晒我管,問左好耐佢先肯話原來佢來我們每人每月俾$10000佢媽媽, 媽就處理晒屋企所有開支(供樓,水電煤飲食),我覺得好似被騙咁! 老實講我係自己屋企真係半個皇帝女(但我唔係大洗港女),俾幾千蚊家用都有鮑蔘翅肚食,點解結左婚我要俾$10000佢媽媽仲要食咸魚青菜!? 而且層樓又無自己個名呢? 我有時都唔知佢係真「孤寒」定係是有心呃我….   另外,我地為禮金嘈左好耐。我叫細妹幫口問爸媽要幾多禮金, 父母話68000另加6圍酒席(我都知我父母好狼死)。我男友話貴佢話只肯俾$50000全包。 但佢自己又唔肯去傾,一直只叫我同家人bargain。其實有咩理由由個女同父母bargain? 有時我問多父母一兩句他們都會話:「你咁cheap架! 咩都幫佢,等佢自己講…」等等既說話。   到了昨天,男友話同我父母去飲茶傾禮金,我以為終於有得傾! 點知佢又怕死無直接問(其實我覺得佢只係遊花園,無問過我父母想要幾多禮金),咁佢無直接問我父母,我父母當然唔會答。之後男友就話:「你父母都詐唔知唔講」,我問男友:「就算佢地第一次唔講,咁係咪你就唔洗俾?你唔識直接d問多次?」之後男友就開始話我無理,話我有問題……   我既朋友都叫我自己儲定禮金,自己俾唔好煩,但我諗緊:「我是否就一生跟著這個人呢?」每次同男友傾,佢只會話我好多要求,佢已經好委就,我好氣餒,好想侮婚……大家有咩建議?   諗樣見到呢段文字,覺得萬惡之源都係衰衝動。愛一個人是浪漫的事,但結婚後要改變自己生活模式,改變洗錢既習慣,就係一大堆現實問題。有人話只要有愛情,咩都唔成問題。乜係真的嗎? 沒有人能和他人長時間什麼都不計較的,結婚就係第一個program將一些現實而又要處理的問題擺上面,好等考驗一下兩位。   所以,係訂酒席以至求婚前就好對某些主要問題有共識了。例如結左婚之後係邊度住,男方會否付女方家用等。你可能話咁做會顯得太現實,可是未有共識既結合,就要付出一旦不適而拆番開既代價。   討論錢銀係必須而重要的,因根據男女來自不同家庭,對錢既用法同概念可存極大差異。先不說離婚家庭,就講阿爸究竟有冇比家用阿媽,已經係處處不同。有人屋企媽咪好叻,根本上自己賺錢就攪掂哂全屋洗費,老豆賺埋既只係用黎買玩具同去旅行,唔使比家用。另有人屋企老豆攪生意,成年先攞大舊錢返黎比一次家用都唔奇,而仔女又未必知。總之出生不同家庭既男女就要趁拍拖時亙相觀察一下,看是否合得來。   同奶奶一齊住確實令男女及雙方父母都為難,可是係樓價高企下呢個又係要大家接受既。所以青年發奮、努力儲錢又係必須。儲錢就係要將你既快樂延遲使用,正所謂如你錢銀有限成日去旅行,到結婚後就要付出一段同奶奶同住既日子。十分公平。   有見及此諗樣網都已加強二百萬上車盤同抽居屋既內容架啦,不過最要緊都係你口袋先有錢。   傾禮金確實係要男方主動開口的,坐埋台「扮傾」之前講好哂亦係一個常用辦法。如果男友唔想可以搵個專業大黔姐做中間人,好似古時傾聘禮咁,可惜又係要錢。以諗樣黎睇男友都係唔肯做主動攪掂禮金呢件事,連咁少野都做唔到,為何娶妻誤人一生呢? 佢建議老婆婚後每個月比七千蚊佢阿媽揸主意做家用,但係而家就只肯開價50000蚊全包,咁既「生意」,大好賺了吧!   相信男友背後都有苦衷,例如一大堆「老母」的怪主意,係單親家庭常見。自古男女結婚須「門當戶對」,如男仕想「高攀」的,亦需證明自己係一個有能之人,其中不無道理。女友食飯由鮑蔘翅肚落得變清茶淡飯,男友知道左女友咁諗都唔好受。所以港男話有部份港女睇錢份上,實在係想先為你免除第時結婚遇到的種種障礙。今日諗樣找來活生生既case一個,望男士實需多發奮,覺得現有女伴太苛索的,你都有權「飛左佢」架! 至於msckw一事,諗樣認為結左婚先至一個開始(係跑道0米),佢係而家未開始(行緊出場)都覺得難過人世,相信心中已有定論,只不過想大家支持給予勇氣,行出佢想走既一步吧!  ———————————————————-

Read more

上車決擇: 大埔與沙田(沙田中心與大埔中心)

收到apple讀者在粉絲專頁上留言問大埔上車有咩好選擇,想買樓作上車之用。Apple話先前既case主角家庭收入都過$40,000,可唔可以睇下初出茅廬既後生仔點計掂數係大埔置業。 大埔河畔與火車站 先講大埔,墟內單幢樓不談。近火車站既選擇有新達中心及居屋富雅花園,近林村河畔一帶有大埔中心及翠屏花園。係大埔火車站一帶私人屋苑未有貼近二百萬既一或兩房出售,貼近二百萬既上車盤只有遠離車站既大埔中心及翠屏花園提供。翠屏花園以三百幾呎既一房及細兩房為主,1.70mil至2.10mil有售。大埔中心一般size大過翠屏,最細既433呎單位都要2.30mil。兩個屋苑平均呎價$5000。平既原因顯然係屋苑間格及近河屋苑交通只有巴士冇火車。 買唔買居屋? 一行近大埔火車站,價錢即有反映,新達中心平均成交價$6500呎,沒有二百萬既兩房供應。唯一方法係用「綠表價」去買居屋富雅花園,514呎未補地價二百期都有得傾。可惜補埋地價都已經成$6000蚊呎,而樓齡已近三十。另外係富雅用$2.00mil買個514呎既兩房富雅都幾夠住,內籠十分實用住到生埋小朋友都勉強可以,屋苑現正逐間維修。留意居屋既升值能力不及私人樓,筆者不建議你補埋地價咁去買居屋。一是新特首已鐵定增加一至兩房公屋及居屋供應,未來升勢會受阻。二是現時居屋補埋地價已經炒到同私樓差不多,加上居屋有標籤效應及買家市場比私樓細。總括是買居屋最正既地方係唔使補地價同平管理費。 沙田正街 筆者愚見,都係買沙田好過大埔。買沙田指買沙田正街既沙田中心及好運中心一帶屋苑,呎價$6000-$6500不等。沙田比大埔所述屋苑呎價平均貴一成,不過以間格黎講沙田390至450呎既一至兩房,做緊$2.30mil至2.80mil不等,而大埔河畔一帶四百幾呎既兩房都要2.10mil。係咁既報價之下筆者會棄大埔而選沙田。   如因個人因素要住大埔,近火車站會更好。政府正計劃將大埔東鐵經上水通元朗及錦上路,交通要素令該地更上層樓。至於沙田中心(正街)加上附近新城市中心係獅子山以北人口最為稠密一帶,交通便利對後生上班一族最為合適。當然4%以上的租金回報率加上屋苑既高流轉性亦為投資帶來誘因,需知地產根本性就在地點,即係人地話”location location location”。 沙田中心(正街)呢個地段係不二選擇。 上圖為好運中心一個423呎一房單位,樓齡29年。相片只顯示大廳間隔,可見頗為寬敞。地上每個階磚為2呎x 2呎,由「最遠既窗」到中間「附有窗台既窗」照數地下有兩個半階磚,即為5呎,夠間多一個房之用,自行將一房變做兩房。如果諗住兩公婆二人世界可索性保留大廳,保證你間屋大過九龍賣緊三四百萬既樓。 以上係筆者對apple諗住用少少錢開始上會既推薦,畢竟樓價急升後選擇不多。係旺區買番間舊樓係為第時環境更好時換樓而鋪路。沙田正街一帶屋苑根本不愁租客,間格可以。第時買大屋可將呢間樓租出或沽售肯定好快有承接,咁你先可以套番舊錢買新屋或令頸寸「鬆動一下」。 樓齡29年當然算老,不過冇人叫你買間屋住成世既。係集合價錢地利樓齡間隔後筆者還是認為沙田佔先,沙中線通車及香港地運北移只會更利沙田。要知內地同胞對香港既認知係由北向南望,城鎮概念為沙田元朗大九龍,過海根本請都唔到。至於將軍澳同馬鞍山,暫時來說只是偏遠小城。 買呢間樓要準備25萬首期,佔樓價一成。用2.1%利息分30年還每月供款$8429,兩夫婦月入達兩萬元即可負擔。要注意印花稅要成三萬七千元,如果你還是想樓價少於200萬,只可考慮更偏遠既河畔花園了或大埔翠屏了。

Read more

白表免補價購居屋

  白表居屋有得抽而就有得買,係時間將之前係homeblogger中7月4 日po過之文再update推出 咩係居屋? 居屋係政府推出既居者有其屋計劃,專為公屋戶購買自住物業而設。原意係為公屋戶提供一個上流機會,用低於市價買樓成為業主之餘,政府又可盡量減省公屋支出,兩者皆有得益。房署對住夠十年既住戶每兩年抽樣審查資產,可惜政府對於公屋戶既資產審查未及嚴格,住戶用盡方法隱藏資產。另有批公屋居民住左就唔想走,交市值雙倍租金留係原本自己間風水公屋,令社會多了批「公屋富戶」。於是真正有需要既人要上公屋真係遙遙無期。至於居屋,係政府安排比公屋居民上流既下一站,一般比同區私樓平三至四成,但係買左要放出去就難D,炒作不宜。 點先住到居屋? 住居屋要填表申請,下次有樓出就會抽人去睇樓。填既表分白同綠色。原有公屋戶主要填綠色,拆出公屋戶籍或私樓居民可填白色。無論你咩色,都要合符入息上限資格,每次有居屋抽房署都會再公佈。約為一人戶$20000(資產不過0.41mil),兩人$40000(資產不過0.8mil)。當然,你貴為業主政府一定係填土廳查到你出黎冇得抽居屋! 咩係5000個一年抽居屋? 如果你係白表,有排都未等到買居屋既機會。因上任特首好少起新居屋,而白表又常排係綠表之後。到梁特首推新政,就係每年分兩次抽五千個人出黎,可以唔使補地價咁周圍全港選購居屋(當然要有人放盤比你) 而家後生一批都係白表居多,佢地只不過住係公屋而唔係戶主。每次抽5000人出黎,比你就咁去任何居屋屋苑唔駛補地價就買間樓。以屯門方便居屋兆麟苑為例,唔使地價買間五百呎既兩房都係130-150萬,希望幫到令年青一代 我「老豆」住公屋,我係白定綠? 先講綠表,佢係比現有公屋戶主既資格。有些人如房署識員都可能獲授此資格。如果你父母係公屋戶主,佢地再買居屋可用綠表,如抽中可不用補地價買居屋及必須交回所住公屋。你自己只不過同戶主(父母)同住,想買居屋要填白表,分別係抽4份綠表先約有1份白表被抽出,所以白表係慢隊,綠表當然快因為政府可以快手收番間公屋租比有需要既人。 點解電視機成日講班後生仔單拖去申請公屋 是的,你夠18歲後只要入息(一人$9200,兩人$14000)少過上限就可申請單人公屋。單人公屋係93年後政府先開始起,百幾呎左右。位置多於天水圍、太和、東涌。通常班後生仔就算上到樓都未必長住係度,霸住間屋都係為自己第時用綠表排快隊抽居屋鋪路。上樓快慢係有計分制,18歲0分,大一年19歲+3分如此類推。原公屋住戶因已享政府福利會先倒扣30分,通常你預排6-7年啦! 想睇下電視機幾時有講? 請留意筆者下一篇文章,有Mr.張炳良係video同你講居屋! 一個人點先可以排公屋快D? 團結就是力量,後生仔搭個冇入息既老人家申請孖人屋係perfect-match! 咩叫分戶? 分戶即原有公屋居屋,分支另一個家庭出黎去入住新一間公屋,通常房署係唔允許既。但係而家香港多左批新移民,過埠新娘又話一齊住有家庭問題,所以多左運用酌情權分戶既case。另外四人家庭聚左新抱生埋仔變六人,新抱好多時會搵個社工攪分戶,話自己有精神病再同奶奶住落去會出事等等。有「專業」既社工專門同人攪呢類申請。分左戶之後,六人家庭可以更有效咁去蠶食政府資源啦。   對我有咩影響? 如果你係白表輪侯者,當然好消息。但係現有私樓價錢太貴,居屋住客放左間未補地價既居屋都買唔到間更大或更好既私樓。在市場參與者突增,供應只多些少既情況下,居屋價錢會比人炒起,兆康苑係2012年首季升幅大大拋離中原城市指數,自有其原因。既然政府提供左誘因比第一批人買上車樓之後,何不起多些少居屋大單位而價錢界乎三百萬既多房單位比賣左居屋既業主換樓呢? 你唔使猛咁起細單位,其實搬走班現有兩房居屋業主出黎都可提供上車盤,更可減低因猛咁起限呎細單位而引致既市場失衡。 為置業者貫通由居屋至私樓既階梯,本來係房協既工作。可惜該機構為求自保,近來新項目如喜雅已漸商業化。係不全面既政策下,受害既又係一班比較窮而上唔到會既人仕或冇樓揸手既睇單邊參與者。推升居屋而令整體樓價上升令佢地置業更冇望,不過呢個劇情發展正符合政府「製造貧富懸殊」、「好心做壞事」既一貫手法。對於政策執行而帶出既一炮過升幅,實在可垂手以待之。

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室