【潘家榮】有耐性同時要有遠見

前日抽升,尋日又跌,到今日又升返晒上黎,如果睇得太過緊,太著重短線波幅,就好容易俾個市chok死。投資唔同去賭場賭搏,賭場就話你今舖買完大,到下一舖你又估佢開乜而去買,舖舖清,但係投資者如果都係咁樣做,其實唔係做緊投資,佢地只不過係賭緊佢地眼光,贏唔贏到錢都唔太重要,最重要係有得過吓手癮,估中左有成功感,所以好多散戶明明喺股市炒左咁多年都係輸錢,但係仍然繼續炒,就係呢個原因,佢地買股票唔係真係為左賺錢架。如果你真係想學賺錢,而唔係為左貪過癮既,咁你就要接受投資係一件好悶既一件事,有乜野好過你揸住隻股王,而佢又係咁升,令你副身家不斷有增長?但係當你已經揸住左最好既野,你唯一可以做既野就係等,大部份時間都係無乜野好做,就算最靚既股票,都唔會一日就升晒俾你嘛,所以大家需要既係耐性。 有耐性,同時亦都要有遠見,睇既野唔係睇今日跌輸幾多,聽日升又賺幾多,而係要睇晒成個大picture,諗點樣可以坐大浪之餘,賺到最多既錢,同時間又可以確保到自己安全。要安全,首先就唔好十上十落,覺得升就瞓身買,覺得跌就清晒啲貨佢,咁樣不斷估升跌,到頭來同去賭場賭大細無分別。要知道呢個世界無一個方法,可以確定到個市一定係會跟你希望既方向去行,當你瞓左身落去,會唔會果次就錯左呢?所以,我做既野,從來都會考慮睇啱會點,睇錯會點,再按返市場既發展再逐步調整倉位,你見我點都唔會企錯大方向就係咁解,所以我寧願逐步去加貨,贏左錢先繼續加,就算買完個市跌左,都唔會有太大心理壓力,總之如果個市有個大升浪,我就一定可以買齊晒貨又坐到啦,如果係跌,我實一定越縮越無貨,避開大跌浪啦。 呢一刻揸住五成多貨,我覺得好comfortable,雖然最近見到有啲股已經好返晒,可以買得,但係我都係等埋下個星期,出埋新既好淡分界線先啦。 好彩尋日無減868,今日升4%。 記住,喺投資市場上面,你能唔能夠賺錢,能唔能夠成功,心態重要過技巧、分析,其實做人都係。 筆者為證監會持牌人,其全權委託帳戶的客戶持有信義玻璃(868)

Read more

【潘家榮】繼續汰弱留強

尋日係威係勢升五百幾點,期指又企得返31100之上,令我都加多兩成貨去到五成幾,不過轉頭美股臨尾市又由升三百變成倒跌,令到港股又跌返近四百點落黎,感覺有啲中左伏,不過又未衰得晒既,起碼尋日加既586海螺創業今日都仲係升,所以識揀股真係好重要。 如果今日期指收低返31100以下,快KSI又會由好轉返向淡,理論上係要減返exposure,揾返啲近期較為弱既股票減返,但係睇返實際情況,原本諗住下一隻減既對象868信義玻璃,今日又升左上黎,所以都係收手唔減住,睇埋聽日先。 筆者為證監會持牌人,其全權委託帳戶的客戶持有海螺創業(586)、信義玻璃(868)  

Read more

【潘家榮】尾市守得穩再加貨

趕緊稿,3點鐘又要做電話訪問,所以都係簡簡單單講策略點樣做,至於背後既理據,成個大picture我諗緊啲乜,都係日後先至解釋返。 尋日估到美股會再落,但就估唔到喺美期仲係低過我地尋日收市時既點數既情況之下,我地可以高開返,而且仲要越升越有,如無意外,今日期指都應該會收高過31100以上,亦都初步有第一個訊號轉返好,所以你見我頭先都有話再加貨,加到去倉位既四成多,如果去到尾市個市都無跌返落去的話,我會再加貨去到五成幾,之前果兩隻無特別講係邊隻啦,雖然我覺得第一隻係好易估既,而一陣準備加既第三隻就公開啦,就係一直都坐緊既586,之前跌落黎時減左一半,黎緊準備尾市補返原先果半之餘,亦都on top再加注,止蝕位定喺21.1。 筆者為證監會持牌人,其全權委託帳戶的客戶持有海螺創業(586)

Read more

【潘家榮】收市前若31150之上先加注

尋晚share左個農曆新年第一日既數據俾大家,話第一日期指多數都係出陰燭,等大家做好準備,原意係等大家唔駛咁心急,一見到高開就即刻衝入去,但係都無諗過一開高之後,就即刻由高位掟返600點落去,跟手又好快彈返晒上黎,你話而家既波幅真係認真誇張,好在而家貨量唔多,只係得三成,如果唔係好易俾佢嚇到騰騰震,與其咁緊張佢日內既波幅,俾佢chok,我寧願等臨收市睇下咩情況,先再決定做唔做野。策略上,如果期指喺臨4點之前,企到喺31150之上的話,我會再進一步加股票,加到去四成倉位,對象係破左頂既強勢股,而唔係仲未做到1xxxx0既股票(同學們明啦),即係唔會係700、2318果啲住。 3點要做電話訪問,講住咁多先。  

Read more

【潘家榮】不應見升得多便衝入市

升到我都有啲驚,心諗:「係咪真係見左底,要補返晒啲貨呢?」不過自己既然用得個驚字,就更加唔應該見升得多就衝入市,反正而家個市既水平,仲低過自己走果個位,最多遲啲要更高位買返,都只係無咁型啫,又唔會真係會錯失成個大浪,所以我都係繼續忍,喺無訊號之前都唔衝入去,如果個市真係咁勁,大不了啲個股出返「1xxxx0」訊號時,點都會買得返。 呢一刻又唔係完全無野買既,今朝買左一隻,呢隻係前排推過,而今日仲創緊52週新高,不過就算買左佢之後,整體倉位都只係去到三成。  

Read more

【潘家榮】要確認走勢好轉才逐步入貨

跌左咁多日,今朝終於有個像樣反彈,恒指曾經升返上30000點之上,升超過六百點,可能好多人見到咁既形勢,都好想揾野買衝返入市,擔心如果個市再升,就會錯失左入市機會。如果你係因為呢一種心態而想快快買返啲貨既,我勸你都係小心啲好,因為投資市場永遠都充斥住貪婪與恐懼,而我地如果係因為恐懼而做既投資決定,好多時都會係錯,究竟你係真心覺得個市見底,而家係千載難逢既入市機會,定係純粹因為見升得多,好驚自己唔夠貨? 要知道跌市唔會直線咁跌,間中都總會有反彈,如果我地每次見到反彈都衝入市,真係多多都唔夠輸,所以我寧願等個市再升多段,確認走勢開始好轉,先會逐步入返貨,而唔會只係見佢升幾百點,升一千點,就急於入市,欲速則不達。過往每次調整尾聲都有個位俾大家,話上得返咩位之上就可以開始買,不過今次,暫時未有耐出現呢個位住。

Read more

【潘家榮】唔好低估跌幅

知唔知點解每一次大跌市,都有咁多散戶輸大錢? 並唔係因為佢地唔好彩,一買就跌,就算買錯最高位,都唔係一個致命傷,最致命既係佢地成日都低估跌幅,買錯唔止蝕之餘,仲要越跌越撈,結果睇錯一次就輸到永不翻身。 要喺股票市場賺錢,從來都唔係講睇市有幾準,而係講策略,可以點樣喺逆勢時將損失減到最低,而喺順勢時又點樣可以大賺特賺。但係好多散戶做既野剛好相反,永遠唔會做好風險管理,覺得平就買,但係又唔肯止蝕,結果一買錯就會坐一個大跌浪。 今日我係咁叫大家唔好買,唔係話個市要跌多幾多千點,又或者覺得個市以後升唔返,而係操作上永遠都唔好低估跌幅,逆住市隔硬死坐爛坐。

Read more

【潘家榮】扭轉投資心態

有啲野真係不吐不快,就算你睇完unlike我,但係我都要講。 對於今次跌市,的確比想像中跌得急,但係我一啲都唔擔心我既學生,又或者客戶會出現咩大問題,因為跟得我方法既,就自然識得進退,就算個市點樣再跌,都唔會有事。 但係當見到一啲無黎過上我堂,但本身己經like我個page一段時間,間中都有留意既朋友,話自己點樣輸,要不斷補孖展,見到我真係好痛心。記得,呢一位朋友初初留言時,個心態仲係升時就搏調整,跌得多就搏反彈,輸多贏少,但係經過一段時間,發現佢留言講既野已經唔同左,開始識得坐長啲既浪,果刻見到我好開心,即係證明我既文章,我一路灌輸既概念,真係有改變左佢,亦都令世界有少少不一樣。不過當見到呢位朋友喺呢一轉跌浪損手,而且仲要不斷補孖展,我真係好心噏,特別係佢仲係用緊「捱緊價」呢個字眼,就知道佢無諗過止蝕,只係一箱情願希望可以捱得返個價上去唔駛輸,但係我見到既野就係,只要再跌多啲,佢只會越輸越多,其實真係唔駛咁樣輸架,只要肯黎上一上我堂,扭一扭轉個心態已經唔駛咁,你見我無一個學生而家係要叫晒救命。   其實點解寧願喺市場輸,都唔願意拎幾千蚊出黎,投資喺自己身上去學一套嬴錢既方法,去改變自己一直喺市場既陋習呢? 呢個世界從來都係,你有啱既方法同埋心態,就會幫到你揾錢,而唔係因為你無錢,所以要用刀仔鋸大樹方法,等你有左錢之後,先再用正確方法去揾錢,如果你本身用既方法唔啱,試問又點可能揾到錢呢?呢個世界並唔係咁樣運作架。   我明白我呢個行業,好多人走出黎教班,個個都話自己有幾勁,但係好多都係呃人,所以提高警覺係好事。如果你睇我既野睇得唔夠耐,對我認識唔夠深,唔緊要,你可以再慢慢觀察。又或者你認為我啲野唔得,有其他人好過我,唔緊要,你可以去揾佢幫手。但係如果你睇左我啲野咁耐,升市跌市都遇過唔少次,我啲野得唔得,你地有眼見,而你地亦都見到我啲學生對我評價有幾高,課程點樣幫到佢,亦都唔見有任何一個上完堂既學生話俾我呃左學費,咁樣係咪值得俾自己一個機會望一望呢? 無論你揀點都好,其實都唔緊要,最重要係你對自己既標準有幾高?你係咪甘心呢一世都同其他散戶一樣,都係炒黎炒去都賺唔到錢,一跌就輸大錢,定係你有決心想去改變?如果係想改變既,就唔好俾無數既藉口自己,話無時間、無錢、要湊仔………如果你永遠只望住自己既限制(limitation),就只會永遠原定踏步,如果唔想原定踏步,就最起碼要踏出第一步。 大家見我早前去左新加坡上Tony Robbins既四日課程,原本我已經book晒機票同老婆去日本旅行,但係因為時間撞左,而我又好想去讀,所以我就選擇改機票,縮短去日本既行程,都令我可以去到上堂,就算要夜晚落機,第二朝上機,由一個好凍既地方,再去好熱既地方,又返返黎好凍既地方,你見我返到黎病左,但係我都照去,當我認為Tony Robbins可以幫到我突破既,就算佢黎緊既課程要十幾萬,又要飛好幾個國家,我都照去報,我係諗方法去Make it Happens,而唔係只係睇住自己有咩limitations。 Tony Robbins 話佢課程第一日已經值一百萬美金,我無佢咁叻,但係一個幫到大家穩陣地坐大浪,而又可以扭轉投資心態,令你從此不一樣既課程,都起碼值一百萬港幣掛。我要求唔多,我希望大家只需要拎幾千蚊上一上個入門班,如果有用既,真係改變左你既,係屬於你自己,而如果係無用既,覺得俾我呃左錢既,亦都可以因為呢幾千蚊而數臭我,公唔公平? 我自己希望改變,亦都希望你地可以改變,至於條路點樣行,就由你自己決定。

Read more

【潘家榮】投資八成心態、兩成技巧

投資市場80%係講心態,而技巧只係佔20%。喺呢個咁波動既市況之下,好多人都會亂,而亂就會更加容易做錯決定,我地更加要心靜,唔好輕易受恐慌同貪婪既情緒所牽動,最忌就係怕蝕底,如果尋日走左貨,今日一見到高開,就好驚走錯左而買返晒的話,又會中左呢一千點既即日跌浪。 唔識睇就行埋一邊啦,唔駛舖舖都要落去賭場賭架,總之開始轉好既時候,先至再逐步建返倉啦,我會到時再同大家講,唔駛心急。信我啦,由呢一個fb專頁開始至今,我有邊一次大升浪係坐唔到,邊一次大跌浪係走唔到架啫?  

Read more

【潘家榮】坐大浪要「穩陣」

平時我教大家穩陣地坐大浪,除左坐大浪三隻字之外,另外一個更重要既係要「穩陣」。 要坐得隱陣,首先就係要唔好係又買,唔係又買,永遠買股票之前,都一定要定好止蝕位,睇下值唔值搏先至去做,你見我喺上個月開始,當個市升得越黎越急既時候,都只係繼續坐貨,間中做吓汰弱強,但係就唔會叫大家不斷去揾野買,係因為當時止蝕位全部都遠,根本唔值搏,如果當時無亂買,講真而家都只不過係喺31000,又唔駛睇到好似世界末日咁,只不過升得快,跌得亦急啫。 其次就係要有discipline,跌穿止賺位就走,而唔係諗住「跌咁多可能會反彈呢?」,又或者「我揸住果隻咁穩陣可以唔駛理」,知唔知一般人喺跌市入面輸咩最多?往往唔係因為佢買錯高位,而係一路跌都唔捨得走,甚至一路跌一路搏反彈,結果越輸越多。 如果真係見底回升,我地會有方法揾到最靚既股票買,但係如果你純粹覺得跌得多就想買的話,唔好唔記得尋日都好多人覺得係大好機會,結果今日如何? 要喺股市嬴大錢,而又可以喺跌市全身而退既,80%係講心態,20%先至係技巧,而家就係考大家心態既時候喇。 P.S. 今朝擺左客戶版微信市評上黎,所有止賺位都post 晒出黎喇,穿左位果啲股票亦都已經走晒,2318都已經減左半,成個倉淨返4成貨左右。我唔怕走錯貨,之後一定有方法重新建返倉,但我就最怕跌市唔識走

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室