【 莫家強 】期權短評 – 低成交市況易受操控

睇住呢幅日線圖,我真係想問一句:「大戶,你想點呀?」 升,又係無成交;跌,又係無成交。升高幾百點又跌返落嚟,跌低幾百點又升返上嚟,不斷重重覆覆。呢啲pattern,根本就係趕客。我真係寧願個市可以跌完落去,重新做返上嚟,咁反而仲好。 就咁睇,今日個市好似幾差,但其實去到兩點鐘市場成交都只係得628億,沽貨量一啲都唔大。細成交既市最易受操控,話唔定下個星期恒指又做多次華麗轉身,重上30700點。 呢啲市,短期既走勢真係無得估。 講少少題外話。港交所主席史美倫本月會訪京會見不同「對口」單位。從佢最近同傳媒既講話,感覺上佢係比較踏實,同更加清楚今時今日香港股市既位置。 例如有關CDR,佢唔會再話「中港兩地股市不會構成競爭」呢種說話,而係確實表明競爭會增加,香港不可能阻止內地市場發展,可以做既只有提升本身既優勢。我對佢任港交所主席,有的期望。 短期既港股,應該唔會有太大轉機。但今年稍後時間,我相信會有分別。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【 莫家強 】期權短評 – 大市阻力難升破,除非

1) 星期一,恒指大升527點,但成交只有936億。 2) 相反,今早恒指跌185點,半日成交就有594億,全日成交有機會重上1000億元。 3) 升市成交少,跌市成交多,過去兩個月經常出現呢種情況。 4) 半日,上升股票562隻,下跌股票841隻。下跌股票明顯較多。 5) 呢一刻,又有少少托大股、沽細股既跡象。一日半日當然無問題,但如果一直都係咁,就要小心。(圖為國企指數之市場熱圖。) 6) 港股全無資金流入跡象。之前講過既恒指30900點阻力,要上破、企穩,更加困難。除非,有理由要夾硬挾指數。 7) 2007年,金融海嘯前一年,大戶肯定已經知道有一啲不能解決既問題存在。果年,恒生指數係先大升上至32000點,然後再大跌。 8) 小米之前話年尾先嚟,但突然又提前咁多嚟上市,原因為何? 9) 另一樣要留意既係,喺不久既將來,會唔會有好多企業借股市抽水?如果有,大家對後市就要更加小心。 下星期四(5月9號)有舊生聚會,同學可以上網報名。我估到時市況會變得明朗好多,會同大家分享應該點做期權部署,博嚟緊有機會出現既大方向。 另外,下星期二初哥聚會,有興趣既朋友亦可到網上報名。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【 莫家強 】期權短評 – 吼高位Long Put

有朋友問:「個市好似好返,可唔可以買貨?」 若以單日表現去睇,今日,其實港股都已經算係相當唔錯。最記碼上升股票都有八百幾隻,明顯多過下跌股票數目,而有個別板塊如內房股、水泥股等等,亦升得幾好。但如果因為咁就再次睇好個市,我會有少少保留。 先睇日線圖,其實今日既升市,對恒指整個中長線走勢,根本無太大影響。 之前一直都話,恒指喺升至30900點之前,阻力唔算太大。因此,今早承接內地股市上升,港股跟升係好自然既事。但係,再睇返大市成交並唔算太多,反映資金未有積極流入股市,呢種情況下,大市好難可以突破高位阻力,假如沽壓增加,指數隨時又會調頭向下。 反而,我自己會吼住高位造淡。近排啲引伸波幅已經唔少,策略上Long Put會係唔錯既選擇。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【 莫家強 】期權短評 – 不確定性

  呢個市,我覺得大家一定要小心。而最大既問題,係市場成日講既「不確定性」。 中興(0763)事件,我唔敢睇得太過簡單。當然,美國如果肯收手,件事就可以解決。但相反,假如件事繼續向壞既方向發展,變成上堂講過既「連續劇」,嚴重性就難以評估。 而呢啲不確定性,未必會即時令到個市變好差,但肯定會減低資金入市既意欲。今朝早大市成交只有485億,無記錯應該係近月新低,都反映到呢點。 更何況,上星期都講過,港股如果唔大跌,暫時都好難向上突破。所以,暫時我都會盡量揸多啲cash,等市況明朗少少再算。 或者,抽下新股,賺錢可能仲易。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【 莫家強 】期權短評 – 市況可能轉變

降準之後,睇咗一日半個港股既走勢,感覺上盤路有好大轉變。後市方向,容許我觀察多一段時間再update大家。但亦都可以分享一下,一啲我留意緊既要點。 1) 小米同螞蟻金服,會唔會真係來港上市?小米,之前話年尾先嚟。螞蟻金服,馬雲親口講過話今年唔會嚟。但兩間公司都突然間傳到好似好快就會嚟上市咁樣。如果屬實,對港股會有重大利好作用。 https://www.mpfinance.com/fin/instantf2.php?node=1516848483526&issue=20180125https://www.mpfinance.com/fin/instantf2.php… 2) 降準既影響。好多人話降準無乜用,但我呢兩日睇咗好多資料,未必係咁。表面上,好似只係增加幾千億元市場流動性,幫助好似唔大。但另一樣嘢係,可以提升內銀股既盈利。 3) 內銀股,係恒指同國指佔最大份額既股票。只要保得住幾隻較大內銀股既股價,兩個指數就好難大跌。 4) 事實上,內銀股本身估值已經唔貴,只要盈利能夠小幅調升,股價就更無下跌空間。今次,就好似要話俾大家聽,要穩住港股,其實唔難。 5) 有大行話,內地今年內仲有條件再降一次準。 6) 當然,難大跌唔代表容易大升。 呢半年,市場實在經常出現大多嘢突然間轉向。話會嚟上市既公司,突然間又會話唔嚟,然後突然間又會話嚟。金仔,放放下飛彈,突然間又變得非常合作。貿易戰,遲啲又可能突然間唔知解決咗。大家要有心理準備,個市可以話變就變。 呢一刻,未敢講話個市會好轉,但內銀、騰訊(0700),我自己仲持有衍生工具好倉,低位一啲都無減過。特別係騰訊,一隻咁好既股票,出面睇得愈差,其實反而可能仲安全。暫時我會繼續坐落去,有變再同大家講。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【 莫家強 】期權短評 – 高估值股票吼位造淡

今日,恒指成份股內跌得最多既股票,好多都係上年表現最好既強勢股。相反,一啲之前無乜升過既股票,跌幅尚算温和。 後市,暫時我唔會再博反彈住,反而會逢高造淡。 有朋友問,可唔可以做Long Put? 我覺得可以。但要注意,港股星期五、下星期一、下星期四都會因假期休市,但時間值都會照損秏,有少少唔著數。不過,如果有睇淡既股票,都可以做。造淡目標,繼續可以瞄準一啲估值高,之前市場睇法過於樂觀,但2018業績增長有機會大幅減慢既股票。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【 莫家強 】期權短評 – 小心風險

最近幾個月有上過堂既朋友,應該已經知道我對個市既睇法。 身邊既朋友,有人睇牛,有人睇熊,但我覺得呢樣都唔係最重要。最重要既係,你睇牛,但你係唔係做緊牛市應該做既嘢。又或者你睇熊,又係唔係真係做緊熊市應該做既嘢。 最大件事,係升就睇牛,跌就睇熊,再升又睇牛,咁反而會輸得最多。但無論如何,唔好睇少嚟緊會出現既風險。 仍然睇好既朋友,最好做足對沖。睇淡既朋友,可以吼高用有限風險既策略造淡。對象最好係一啲「夢已完」既高估值股票。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【 莫家強 】期權短評 – 買貨,都要識揀股

昨日,除內銀股外,其餘既股票期權倉位已清倉獲利。今日,開始回補返少少。後市,恒指於30800點應有不錯支持力度,如跌到會先睇盤路,再決定買唔買貨,同買幾多。 但有一樣嘢,大家要注意,股市嚟到呢個階段,會開始有一啲之前強勢既股票,轉為弱勢。其中一隻,係港交所(0388),有意入貨既朋友要小心。 其實港交所,上月開始我就已經叫身邊既朋友有高價就沽,甚至造淡。 港交所之前既升勢,係由好多獨角獸股傳聞會嚟港上市帶起。初時,只係傳聞,已經足夠隻股票大炒特炒。 但隨著日子一直過去,市場要求既就唔再只係吹水傳聞,而係要有實質進展。呢方面,不單止無,仲要馬雲親口講過,螞蟻金服今年一定唔會嚟;雷軍被問及記者問及小米會否來港上市,未有確認;講到好似好實在既陸金所,都話唔嚟。沙特阿美,曾有特首開聲話想佢會嚟,但今日已無再幫口。加埋內地企業回歸A股既方向,港交所既獨角獸夢,係咪已經完結,值得大家思考。 加埋港股2月成交超少,遲啲出第一季業績,按年比較可能仲見得人,但同去年第四季比,肯定肉酸。過埋呢浸沽壓,如果大市成交又回跌至千一萬以上,隻股票跌勢將難避免。 申報:並未持有港交所。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【 莫家強 】#期權短評 – 個市一直漏水

同二月初既跌市唔同,今次,大家第一時間已經知個市點解跌,所以震盪唔大。另外,今朝睇到啲評論,話就算爆發貿易戰,最受損都唔係中國。呢樣嘢,如果往後再無特別既發展,我相信對港股未必會有太長遠既影響。 反而,我最擔心既係,個市好似一直漏水,港股既成交愈來愈少,如果情況持續,每逢大市反彈近阻力位,都係造淡既機會。 暫時,恒指較大既阻力位大慨喺31300點左右,大家都可以留意。 但我相信個市唔會一直係咁。之前話要上市既一啲大型新股,拖咗咁耐,我估應該都差不多要上馬。有大型新股上市就會有造勢計劃,到時,我相信會有較大值博率既買貨機會。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。      

Read more

【 莫家強 】提防大市短期內轉向

恒指,暫時繼續睇會升至31712點。升抵之後,要再睇盤路先決定往後策略。   新年前話開始睇反彈,先睇30300點阻力,如能衝破可望31700點,呢個係基於技術分析,半補裂口通常最後會被完全收復既特性。但過去既情況係,當裂口被回補後,市況可能會於短期內出現180度轉變,呢樣大家要保持警覺。   另外,在大市上升既過程中,我最擔心既係成交一直減少。成交少既唔好處係難以消除高位蟹貨,都會增加大市遇上阻力轉向既可能。   但揸住貨既朋友,我建議可以繼續揸先,有轉向跡象先食餬都唔遲。但高追股票,就要小心。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室