三十中年遇上超筍銀主盤? #1739

諗Sir你好,想請教轉按以及資金運用問題。小弟現31歲,太太30。本人月收入4.4萬元 ( 1個月Year-end bonus ),太太3萬元 ( 2個月Year-end bonus ), 二人合共大概25萬元

現居市區私樓太太單名持有,2014年460萬元買入,8成按揭,現約值660萬元,尚欠銀行312萬元,月供11,000元。父母聯名有灣仔唐樓55年樓齡,多年前買入,現約值500萬元冇按揭。

 

本人供樓及月開支合共大概44540元而太太名下香港沒有物業。由於本人將轉工,我計劃之前轉按做更低息HIBOR PLAN, 並賺銀行/中介回贈共2%, 套出現金80萬,月供款14000元

 

另外希望擔保父母樓加按一些錢,都用來購買債基,幫助儲錢,本人同意諗Sir以儲樓作為理財及退休作主軸的策略。

此想法如何? 請諗Sir指點迷津。

ANSWER:

我地用講到爛既SWOT ANALYSIS去再睇睇讀者個案:

Strength: 年輕(30歲)

Weakness: 少現金(只25萬)

Opportunity: 父母有樓未加按、或可運用。債券市場在較低位置,不俗吸納時機

Threat: 短線有一旦樓價再被外來人搶貴會有被擠出香港之險、中線有父母需要醫療或自己中年要額外醫療支出之險,長遠有儲蓄不能應付退休之險

 

估計讀者幾年前買樓結婚用掉不少現金,故今時只25萬現金係手可以接受,惟不時要留意儲蓄率問題。至於父母唐樓係未用好自己錢投資前不要亂運用,加上唐樓只可按五成及需讀者擔保,較好處理方法係先趁市高按錢出黎,放在MORTGAGE LINK戶口,即500萬可按250萬出黎而最多可放一半(即125萬)係MORTGAGE LINK活期戶口,收相等於按揭利率之息口,即約2.2%。留意筆者替絕大部份人擔心的是: 一有錢係手最差係買野洗哂佢、次之係硬要一次過於數星期內落哂注投資。若閣下有上兩缺點寧不加按。

 

有些人怕加按後如樓市跌被銀行CALL LOAN點算,筆者在銀行工作一段時間,經濟差時銀行會先從公司戶口入手,一些老闆有公司戶同時有樓按係銀行的會率先被CALL LOAN。另外亦不時有客人問有冇銀主盤「筍盤」買,筆者只好笑言應對。惟銀主盤很多時業主已走佬,銀行只運用銀主權利將間樓係法庭收番黎,但買家留意如「走佬業主」日後出現及清還債務,銀主新買家可能要應付「走佬業主」的訴訟。正因有此風險,所以銀行拎銀主盤去拍賣行拍賣,講明銀主新買家唔比查契的,這是為什麼銀主盤「平」的原因。而不少人不知就裡認為銀主盤「筍」。

 

另一方面銀行逼不得已都唔想收番間樓比拍賣行叫賣,拍賣行要向銀行收費,收樓不是銀行上佳選擇。近日有人網上話同銀行高層查問過,萬一間樓負資產銀行會唔會CALL LOAN補水,銀行高層話會,叫大家小心。誠然作為一個銀行高層,你認為佢會講「我地就當間樓負資產緊都一定唔會CALL LOAN嗎?」場面話與落地執行是兩回事。

 

有時一些人講多,就露底了。真要檢討自己能否作批判思考,或是只人云亦云的人。有些人收左錢叫佢唱好股票佢就唱,習慣唔諗,註定被淘汰。在證監對股評嚴厲監察之下,下一浪升市有望出現些更有質素的股評。

 

當讀者加按到錢之後,自己樓按到80萬,手上有25萬,父母樓如按有250萬,月供多了約11-12K,而按昨天文章的「博命收息人」,槓盡再利用A+B債基餐,22%-25%一年是可以的。不過筆者認為讀者不需「博命」,不槓盡收15-18%一年已夠了,更應分段入市。300萬投入,每注100萬,1-1.5年後買哂可收息年54萬,每月有$45000月入新增。今時先下一注,等市達咁時段的低位加上氣氛差時第二注,等市確定雨過天晴後入第三最後一注。至於點量度氣氛差? 雨過天晴? 筆者有數理化的方法在收息課上教授。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室