高鐵通車後的元朗式投資機遇#1681

你好,諗sir, 我剛剛上完諗sir 既買樓001 和 收息101, 感謝呀sir 你既指導,增進好多投資基本概念,我準備置業,有d 疑問,希望諗sir 你可以指導下小弟。

 

本人30歲,人工$38000,我打算係上水置業,上水中心3 座 低層(2 手樓)330尺,大概25年樓齡,510 萬,根據諗sir 你第一堂既建議,我跟過堂上所指查閱報告,我見北區既空置率(2.9%)(相比屯門5%),加上佢既未來供應大約296伙(而屯門1160伙)。 可唔可以總結為一個值得投資既地區,

另外,我初步既諗法係用我女友(人工:41000)單名俾2成首期買入(30 年還每月供$15000),再租出去(大約有萬二蚊租金回報,我地自己再搵其他地方租),希望3 年後再換大屋或者搬近市區,想睇下諗sir對於我既諗法點睇。再一次感謝諗sir 既指導。

 

ANSWER:

是的北區都好,筆者教學目的就是我講方法,學生自己查到。慶幸讀者能自己識找答案及精進,修畢後就可以靠自己而唔需再返黎,真正「醫病」能斷尾。近月高鐵經常被媒體當作笑柄,筆者明白起呢條膠野用左好多錢,但錢都已用鐵已起完,那就惟有理性一點向前看。筆者認為高鐵在開通3-4年後才見威力,給予一個「元朗式」的機會。

 

什麼是「元朗式」機會? 就是列車能大大縮短兩個地方之間的距離,係西鐵未通車之前,屯門去中環近過元朗、通車後元朗去中環近過屯門,因為元朗出荃灣只縮至10min,元朗去尖東只20min,因此元朗發展及樓價近十年係點!? 相信不用煩你再提吧。

 

同一件事,真有可能發生兩次,只不過今次換左係福田同西九龍。高鐵讓你用$68,就能15min往來福田同西九龍,班次好密,福田站內有月台轉去深圳地鐵。誠然福田附近有質素既樓唔係平,未買過樓既年輕人絕不要本末倒置上內地先買,但閣下是有資金係手的中年人,在了解法制後於內地內添一房可以考慮,但絕不要重注大手買。主因內地法制不健全,世界對儲存資產究竟放邊好大致有答案: 新加坡、瑞士、英國、香港…

至於讀者提及北區,再跑贏有難度,但應不會落後,區內亦不少人將三房就間分租比一些內地客,共用廳而不打本改建去慳成本,買上水粉嶺就是有這些機遇,至於想做要有人帶你入門口才知門路,筆者只係識有呢種經紀但冇去該區試過。要贏較難之依據是深圳河兩邊可發展之地: 即上水及深圳口岸一帶,能發展都搞了,至於政府提及河套地區只聞樓梯聲。誠然今時看香港地圖應掉轉黎睇,內地人到港,又或廣東省的人到港,上水及粉巔是佢內地的家與香港目的地之中間位。屯門及YOHO TOWN很多時為深圳灣大橋落車的第一站,上水中心就好似當年的羅湖商業城,說不定第時內地人在上水中心按腳及修甲後,再返深圳訓覺。福田應吸引不少在港工作而植根深圳的內地人住,至於香港人要適應內地就因之而異。讀者不妨由上水中心開始,下步再向北望。至於中西區及灣仔,作為內地人你冇哂特別需要都唔會過個邊,上山頂觀光十年睇一次都夠吧…

明白法制是內地與香港一大分別,港人老一輩將香港打造成誠信之都,商業交往遍佈世界各地,這份遺產恐怕會在未來十年丟失。筆者唔係話香港新一輩比不上舊人,而係香港新一代將由起碼30-40%內地有關的兒童組成,佢地可以係雙非,或單非,父母在內地而10年後成為在職港漂。筆者所見他們充滿活力,人生觀未必與世界接軌但肯努力上進,他們參與社會勢必將香港「向下溝」,結果係點大家可想而知。筆者常說有能力者你可兩手準備隨時就走,平庸者要早作心理準備。

 

由於讀者工資有38K而手友41K,兩人借貸力共1023萬,今時首期唔夠同意由兩房開始,幾年後儲到實力再想轉三房或內地購房未遲。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室