【潘家榮】暫不會因大市而無故沽貨

簡讀:
– 如果期指突破31475就正
– 未突破之前,買返啲逆向ETF做保險先
– 個股仲係靚,繼續坐

詳細市評:
今朝五月大單邊行左Step 3,所以系統上出現左一個睇淡既訊號,不過要留意返,五月大單邊係一把兩面刃,佢既優點係可以用一個好近止蝕位既方法,去搏一個中線幾千點既大浪,上年就成功用三百點搏左八千點返黎,但係佢第一邊就即刻睇中既成功率唔係好高,只係六成幾,好多時都要靠第一邊止蝕果時再反手,捕捉返另一個方向既單邊大浪,所以呢個方法最起碼預定兩注,唔好第一個方向就瞓身。

先前講過,呢排啲股升得咁好,我自己有Bias偏向睇上多啲,所以我寧願第一個方向需要止蝕,即係期指企穩返31475之上(唔係exactly就咁升穿,到時先再講),反手果吓就可以無顧慮咁去睇上,但係市場唔輪到我地話事,如果出現左訊號,啱聽就跟,唔啱聽就唔跟,咁樣即係跟feel炒,好容易出事,萬一真係跌左落去,而我又完全唔理咁又點算?所以我都要有兩手準備。

而家揸住七成貨,而且啲股又升得好地地,暫時就唔會因為個市而無啦啦走去沽貨,萬一個市升上去既時候,呢啲股好容易買唔返,最多定個極近既止賺位。然而,我用淨低果兩三成錢,買左啲逆向ETF頂一頂,要留意咁樣唔係對沖,喺課堂上教過,咁樣做係對沖唔到,我純粹借用汰弱留強既概念,睇吓邊樣野被市場淘汰,如果個市跌,啲股跌穿位就減,自然個倉只係淨返逆向ETF,純粹睇淡。但係調返轉,如果個市係升,逆向ETF止蝕,大約輸2%,而兩三成貨既2%,其實佔成個倉既表現只係好少,算叫做幫補吓,同埋當如果真係落去既時候,唔會進退失據。做策略既時候,呢啲數要識計,唔係就咁賭升定賭跌。




本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室