【股海崢嶸】潘家榮:武斷睇市如賭大細 (2017/03/04)

____0000

 

 

好多專家睇市,只有兩個選擇,一係睇好,一係睇淡,睇好就好自然叫你買貨,睇淡就會叫你咩貨都唔好買,甚至不斷搵位做淡。

 

如果你純粹係寫股評既,咁樣無問題,睇中左就可以認叻,等其他人覺得你好準,如果睇錯左,大不了下次再估過,到你果次睇中返就大肆宣揚,大部份人都係善忘既,你係咁講你中,而估錯既唔出聲,其他人只會見到你中,又係會覺得你好準。

 

 

但係如果你真係落場,呢種操作手法其實好危險,因為當你完全無理後果,咁武斷去睇個市,一睇錯就會好大獲。就好似有啲人個市一路升一路睇淡,唔買貨之餘,仲要不斷揾位做淡,最近個市終於跌返啲喇,即刻好興奮講都話個市要跌啦,仲要磨刀霍霍準備點樣大沽突沽落去。

 

 

當然,如果黎緊個市真係從此見頂,跌幾千點落去,佢地就可以反敗為勝,講自己fundamental可以睇得有幾準喇,不過呢度有個問題,就算黎緊真係要跌落去,其實都無必要咁樣一路升一路捱,捱左千幾點上黎,點解唔等個市跌先順勢做呢?而且有無諗過自己會睇錯?如果你睇錯左,個市一路升,你只係做沽而又無買過貨,就當你有個止蝕位,例如升到上兩萬六就唔再睇淡喇,咁上到兩萬六你又會唔會買返晒股票?定係繼續相信自己既睇法,就算升到上三萬點都繼續睇淡,睇到跌為止?

 
真正落場,睇法跟本唔重要,點樣做先至最重要,當我地定好每一個策略,唔好諗住一定會咁行,而係要諗定升要點,跌要點。

 

 
呢一轉睇好左兩個月,由21700開始揸上黎,呢一刻有訊號話要小心喎,有機會調整喎,但係你都無見我叫大家即刻沽晒啲貨等,因為一來市跌唔代表揸住果隻股會跌,你睇下323、460今日仲破緊頂,如果乜貨都沽晒,好多時會因為避個市跌,而從此走甩最靚既股票,錯失往後既升幅。再者,萬一個市唔跌,而升返上去,咁樣走黎走去又係多餘。相反,如果個市同啲股都跌,好自然佢地就會逐隻逐隻跌穿止賺位,注碼會不斷減低,亦都會避到個跌浪。

 

 

所以,大家唔好再用舊思維,點估個市跟住又要點做,而係要學識點樣幫自己定好策略,無論咩情況都可以令自己企喺嬴面高果邊。

 

 

 

 

筆者為證監會持牌人,其全權委託帳戶的客戶持有馬鋼(323)、四環(460)。

 

 

 

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室