陸羽仁 – 暴跌一夜情

A股經歷「1.19慘案」後唔止喘穩,昨日仲出現報復式反彈,滬市在短短兩日已累升超過200點,重返3300關。內地股市就係咁激,當日中國證監會話孖展違規,市場就傳有1000億孖展要斬倉,在黑色星期一沽到命都無,但跌得咁勁,中國證監會又急急話唔急於逼違規戶平倉,股民都睇死阿爺怕痛,自然放膽入市,?而家仲威到話周一跌市只係「暴跌一夜情」,即係話跌一晚就玩完。我在跌市時叫咗大家低吸,怕且你哋入唔齊貨,都入到一注半注啩。

 

市場估計,今日歐洲央行有可能宣佈量寬計劃,歐洲再開動印鈔機,好多人就會諗,中央放水的空間都會多啲,就係呢種寬鬆氣氛推動下,中港股市即刻彈咗上去。而內地去年GDP增長不達標,市場憧憬人行會再放寬貨幣政策,上證指數昨午最多曾升逾5%,收市飆升4.7%,創逾五年來最大單日升幅,收報3323點,漲了150點;深成指收報11372點,漲375點。兩市成交8086億元人民幣。

 

歐洲放水 A股先升

有人話,放水好似食白粉,食親就會上癮,上癮就會戒唔甩,跟住搞到體質差晒,一唔食就軟手軟腳,變成倚賴,呢個就係全球央行的狀況。先唔講放水啱唔啱,炒咗先至算,在歐洲量寬前夕,昨日個市確係炒作人民銀行會加碼放水,進一步推常設借貸便利(SLF)。

 

在滬深連續第二日急彈下,港股受A股向上帶動,一度升破1月15日高位24369點,全日最終升超過400點,恒生指數收報24352點,升401點;國企指數收報12021點,升279點,成交增至近1043億元。多得A股勁升帶挈,各類A股掛鈎的ETF同樣造好,買賣掛鈎基金最大好處係唔使理個股風險,覺得大市價位合適就可以出擊,成為了好多本地股民係A股炒上炒落分一杯羮的搵食工具。

中移動(941)與騰訊(700)為升市火車頭,合共為恒指進貢151點。里昂續撐中移動,中移動變回「紅底股」收市,收報102.1元,飆咗4%。

國家商務部新聞發言人沈丹陽透露,商務部在制定自貿實驗區外商准入特別管理措施時,擴大開放領域。有港口概念的招商局(144)炒高6%,收27.6元,罕有成為升幅最大藍籌股。

近日一直有讀者問起跌市買乜,我就話大市焦點都仲係A股、金融股同龍頭地產股,結果真係咁。

 

「1.19慘案」主角升番晒

呢啲股在「1.19慘案」跌得最勁,昨日全部大反撲,早兩日插得勁的內房龍頭萬科(2202),昨日大升6.5%,收17.78元,咁巨型隻股升咁多,炒到好似細股咁。

另外,內險與中資證券股全部向好,內險龍頭國壽(2628)造31.8元,漲3%。最勁係中國太平(966)單日急升8%,公司收市後發盈喜,預期截至12月底止全年度股東應佔盈利將增長超過130%,主要由於集團保險業務產品結構持續改善、個險代理人產能逐步提升、大客戶戰略合作漸見成效,以及優異的投資收益,人壽保險盈利錄得顯著的增長,境內財產保險業務的盈利亦取得較大的增幅,其他主要業務線條均保持可觀的盈利貢獻。

 

  至於內地證券商股方面,曾因為大股東減持而成為焦點的中信證券(6030)抽升了6%,收26.5元。

        總之呢幾日急跌落嚟嘅股份若然股民無趁機會撈貨,話咁快佢又升番唔少,手慢者就可能買唔切,我覺得急彈完不排除有少少回吐,唔夠貨者可以等回吐時買啲。












本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室