自己人工即增50%之個案 #555案庸才

首先多謝諗SIR指點,上咗收息101同日本樓獲益不少!現等待上收息103希望跟諗SIR多多學習!
現有難題希望麻煩諗SIR賜教!
由於轉職位收入大減(零售行業,大減佣金),想部署好計劃保持資金增值及分配,
期望日後可以做到財務自由。
小弟今年32,單身同家人住公屋,未有物業,不介意繼續住公屋,
現月入$21000
支出:家庭開支$12000(包括雙倍租金$4300(將會減少),供養父母,雜費,生活費)
保險$2000,基金$2000,進修$2500=$18500
我現有資金如下:
CASH$800000
人民幣定期:520000($650000)
政府ibond:$41700
股票:$260000(自問炒股技術差)
Q1:想問應借盡90%入市買資產定用其他收息方法保持資金等待良機?
Q2:有基金每月供$2000,供了5年現值約$110000,覺得收費高亦基金選擇得唔好有虧損,如現取消要CHARGE約可取回$82000,是否應取消減少每月開支及將資金轉其他投資?
Q3:由於香港未有物業及資金唔多,日本樓是否不太適合?

小弟自知錯過多次良機,希望可好好把握下次機會,感謝指導!!

 

答案

讀者都係咩都買D個種投資人、在理財路上未知自己長短,進退有點失據、更錯失機會。相信讀者之前人工不俗、可惜現時佣金大減人工只淨$21,000,好在有趁之前好日子儲定約港幣1.5mil,再有公屋提供低廉居住成本,且看此案如何拆解。

 

假設讀者人工不能未能增加,那理財大方向定為買樓致富。此法優點係可以小勝大、缺點係需要長時間。那既然人工不能一時大增,只好用盡槓桿、趁後生借盡買樓收租。用首期幾十萬冒險入手樓房收成萬蚊租、應有$1000-2000正現金流。作此事目的是要找個租客幫你還債,十幾年過後多間樓在手。此事肯定性十分高、比起大家炒股更客易成事,所需要的就是時間、等待。所以讀者宜趁本年早早買個上車盤完成安排。由於細單位跌極有限、電視已經講過而家人工冇九千幾真係難搵人做洗碗,因最低工資令「看更」都可以搵近九千蚊、勤力些少搵成萬一蚊。咁你話仲有冇人做洗碗? 工資上揚下細價樓堅挺,當然此類樓的投資價值未比名校區的三房高、可是上車兩房提供了一定防守性、合本案讀者小本所需。

 

買樓收租係主軸。相反如人工及現金流都強勁、或年紀漸老者,買樓就未必係佢杯茶。有人問咁股票定買樓好? 其實你冇需要分清邊樣好、因兩件事係可以一齊做的。關鍵在於有人幫你搞好每邊配置份額。失敗者往往是過份買入股票、或過份借貸買樓。所以大家要先搞好資產分配份額、再去學些硬功夫搵筍盤、選取爆升股。

 

主軸係香港樓不妨將手上現金投放於海外物業,原因係你在海外置業,好多時借錢個file就由頭開始,如獲重生一樣! 你知道那個爽的感覺嗎? 如否,即係你連香港既借貸力都未知為何,或未然用盡。除非你本身已財務自由、否則定必要搞清借貸力係乜。日本樓、英國樓、美國樓各有特色,讀者不妨將幾十萬轉戰日本、因他在香港置房不會用超過七十萬做首期、否則就係浪費了自身借貸力,冇跟足「借得就借」之原則。係日本買樓收10%年息,不難找人協助你,亦可4月12日黎本網搞的講座聽聽。淨低既錢可考慮收息方法、年息在10%之上,放於香港亦可隨時取回,當然此法有別於投資實物磚頭,要先花時間理解後再投資為上。

 

搞好之後,讀者幾十萬用作香港置業,淨低既分別放於香港買債收息及在日本做下業主,每月可以產出一萬元的收入,足足是現時讀者的人工之一半,人工即時增加了50%

 











本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室