中原地產創辦人施永青先生在一個講座中，講了一個4-3-2-1的投資組合概念，呢個唔係踢足球的陣式，而係將物業相關資產、証劵投資、債劵及外幣同埋貴金屬等投資按比例分佈，施生在席上就分享了佢既比例。
40%物業相關資產
30%証劵投資
20%債劵及外幣
10%貴金屬
施生是中原地產創辦人之一，對地產市場熟識是理所當然，所以分配最大比例在物業相關資產上是可理解的，咁會有人問，既然咁熟行情，點解唔訓身去搏最大利潤？分得40%咁少係唔係睇淡後市？
如果咁樣都問得出，此人一係就係陰謀論專家，一係就唔係有錢人。 有錢人同窮人的分別係窮人子彈有限，想賺盡只有集中一個項目重鎚一擊，一係得一係唔得，而有錢人就唔同，拎一千萬出黎買恆生收息一年都收50萬股息，所以有錢人的資產分佈，必定會以分散風險為重點，而唔係利潤最大化。
因此以施生的身家來講，擺40%在物業相關資產已算是很高的比重。 假如施生堅持這個資產分佈比例，當物業價值上升時，物業相關資產就會跟隨上升，令物業佔整體資產比例增加，所以就要賣出部份物業相關資產令組合回復4-3-2-1比例，不過一般人就會以為這是減磅睇淡後市的表現，似乎是諗多左。 普羅大眾一般都以物業投資佔最大比重，一來物業價格高昂，加上按揭條款收緊，買樓動輒要動用100萬現金，二來過去幾十年樓價整體都上升中，買樓已被認定為有買貴無買錯。
不過做按揭買樓都算係槓捍投資，升市時賺錢以倍數計，跌市時隨時變負資產，所以在可能範圍下，應盡力將物業資產淨值（即資產價格減負債）比例下調至個人投資組合的一半或以下（如施生的40%）來平衡風險，避免資產因樓市波動而受到牽連。
by梁隼